شربة فريك الذي تمتاز بها مناطق شرق جزائر

الحمد لله وحده .. والصلاة والسلام على من لا نبي بعده ..
سيدنا محمد صلى الله عليه وسلم ..
سيد الأولين والآخرين ..
وعلى آله وصحبه أجمعين .. إلـى يوم الدين ... 
 

نبدا بسم الله

 
المقادير

فخد او صدر دجاجة + قطعة لحم غنم او بقر + بصلة كبيرة او 2 متوسطين مفرومة 3 سنات ثوم مفرومين
عود كرافس +طماطم مصبرة 2 ملاعق اكل
طماطم حب مرحية 2 حبات صغار تكوني فورتيها او غليتيها وترحيها ملح وفلفل اكحل وزيت راس حار اخضر و كسبر مرحي اذا كنت تحبي طعموا و فريك جاهز
طبعا و ملعقة صغيرة غبرة فريك
 
التحضير

اغسلي اللحم و الدحاج جيدا و احطيه في قدر و اضيفي له البصل و الثوم و الزيت و الفلفل اسود و الملح و الطماطم المصبرة و ممكن تضيفي كسبر مرحي انا مانحطوش و تخلطي كل شيىء و تخليهم على نار هادئة يتقلاو حتى يذبل البصل و تنسايش تحركي ساعة على ساعة

حتى تتقلى مليح ضيفي طماطم نتاع الحب و زيدي قلي شوية و امبعد امرقي بماء سخون و خليها تستوي حتى يطيب الدجاج و يقرب يطيب اللحم امرقيها بكمية من الماء و خليها تغلي و بعد ما تهز الغليا ارمي كاس صغير او نصف كاس كبير من الفريك و الفلفل الاخضر اذا ماتحبيش الحار خليه مغلوق او استغني عنوا و نقصي للنار و خلي الفريك يطيب على الاقل ساعة او اكثر و ماتنسايش تحركي ساعة على ساعة باش مايعجنش الفريك كي تنشف امرقيها بماء ساخن و بعدها ضيفي غبرة الفريك و عود الكرافس و خليها تغلى 20 دقيقة حتى تختار و طفي عليها

ماتخليش المرقة عاقدة الفريك بعد ما يبرد يتكاثف و حطيها في غميقة و زينيها بدبشة مقطعة رقيقة
 
 
ملاحظة

ممكن تعملي شربة الفريك بالدجاج فقط او باللحم فقط اذا ماتوفروش الاثنين و اذا توفروا راهم يزدوها بنة ايضا ممكن تستبدلي اللحم بكريات من الكفتة مداوية و ارميها تطيب بعدما تمرقي

و شهية طبية

منقول
سلو وجد تفضلوه بالصحة و الراحة
نتمنى من الله انو يعجبكم و اللهم بلغنا رمضان و في امان الله